1 æg ic be me sylfum soðgied wrecan,
2 siþas secgan, hu ic geswincdagum
3 earfoðhwile oft þrowade,
4 bitre breostceare gebiden hæbbe,
5 gecunnad in ceole cearselda fela,
6 atol yþa gewealc, þær mec oft bigeat
7 nearo nihtwaco æt nacan stefnan,
8 þonne he be clifum cnossað.
9 wæron mine fet, forste gebunden,
10 caldum clommum, þær þa ceare seofedun
11 hat ymb heortan; hungor innan slat
12 merewerges mod.
13 þær ic ne gehyrde butan hlimman sæ,
14 iscaldne wæg. Hwilum ylfete song
15 dyde ic me to gomene, ganetes hleoþor
16 ond huilpan sweg fore hleahtor wera,
17 mæw singende fore medodrince.
18 Stormas þær stanclifu beotan, þær him stearn oncwæð
19 isigfeþera; ful oft þæt earn bigeal,
20 urigfeþra; ne ænig hleomæga
21 feasceaftig ferð frefran meahte.
22 Forþon him gelyfeð lyt, se þe ah lifes wyn
23 gebiden in burgum, bealosiþa hwon,
24 wlonc ond wingal, hu ic werig oft
25 in brimlade bidan sceolde.
26 Nap nihtscua, norþan sniwde,
27 hrim hrusan bond, hægl feol on eorþan,
28 corna caldast.
29 Forþon cnyssað nu heortan geþohtas,
30 þæt ic hean streamas, sealtyþa gelac sylf cunnige;
31 monað modes lust mæla gehwylce
32 ferð to feran, þæt ic feor heonan
33 elþeodigra eard gesece.
34 Forþon nis þæs modwlonc mon ofer eorþan,
35 ne his gifena þæs god,
36 þæt he a his sæfore sorge næbbe.
37 Ne biþ him to hearpan hyge ne to hringþege,
38 ne to wife wyn ne to worulde hyht,
39 ac a hafað longunge se þe on lagu fundað.
40 Bearwas blostmum nimað, byrig fægriað,
41 wongas wlitigað, woruld onetteð;
42 ealle þa gemoniað modes fusne sefan to siþe.
43 Swylce geac monað geomran reorde,
44 singeð sumeres weard, sorge beodeð
45 bitter in breosthord.
46 Forþon nu min hyge hweorfeð ofer hreþerlocan,
47 min modsefa mid mereflode
48 ofer hwæles eþel hweorfeð wide,
49 eorþan sceatas, cymeð eft to me
50 gifre ond grædig, gielleð anfloga.
51 Forþon me hatran sind dryhtnes dreamas
52 þonne þis deade lif, læne on londe.